Një studim i ri ka zbuluar se njerëzit modernë mbartin material gjenetik të trashëguar nga dy popullata të lashta njerëzore të panjohura më parë, duke hedhur dritë të re mbi evolucionin e specieve njerëzore.
Hulumtimi, i publikuar në revistën shkencore Science, u realizua nga studiues të Universitetit të Kalifornisë në Berkeley, të cilët zhvilluan një teknikë kompjuterike të quajtur TRACE. Kjo metodë u mundësoi atyre të rindërtonin marrëdhëniet gjenealogjike të lashta duke analizuar qindra gjenome të njerëzve të sotëm, pa pasur nevojë për ADN të nxjerrë nga fosilet.
Studiuesit identifikuan një linjë të panjohur, të quajtur “linjë fantazmë”, e cila besohet se është ndërthurur me paraardhësit e njerëzve modernë në Afrikë më shumë se 50 mijë vjet më parë, përpara migrimit të madh të Homo sapiens jashtë kontinentit.
Sipas studimit, kjo popullatë ishte ndarë nga paraardhësit e njerëzve modernë rreth 800 mijë vjet më parë. ADN-ja e saj përbën sot rreth 0.5 deri në 1 për qind të gjenomit të çdo njeriu modern dhe është identifikuar si te popullatat afrikane, ashtu edhe te ato joafrikane.
“Ne arritëm të identifikonim segmentet e gjenomit të njerëzve modernë që vijnë nga kjo linjë ‘fantazmë’ dhe të tregonim se kjo trashëgimi gjenetike gjendet te të gjithë njerëzit modernë,” tha një nga autorët e studimit, Yulin Zhang.
Ekipi zbuloi gjithashtu prova për një linjë edhe më të lashtë, të cilën e përshkruan si “super-arkaike”. Kjo popullatë mendohet se u nda nga paraardhësit e tjerë të njerëzimit rreth 1.8 milion vjet më parë dhe më vonë u ndërthur me denisovanët në Euroazi, duke lënë gjurmë gjenetike që përfundimisht u trashëguan edhe nga Homo sapiens.
Megjithëse identiteti i saktë i këtyre dy popullatave mbetet ende i panjohur, studiuesit besojnë se ato mund të kenë qenë të lidhura me grupet njerëzore të Pleistocenit të Mesëm në Afrikë dhe me Homo erectus në Euroazi.
Sipas studiueses Priya Moorjani, gjetjet mbështesin idenë se evolucioni njerëzor nuk ka ndjekur një vijë të thjeshtë zhvillimi, por ka qenë rezultat i një rrjeti kompleks migrimesh dhe ndërthurjesh mes popullatave të ndryshme njerëzore.