Një aksident i rëndë ka goditur një kantier hidroenergjetik në veri të Indisë, ku shembja e një tuneli u ka marrë jetën të paktën shtatë punëtorëve. Tre persona të tjerë nuk janë gjetur ende, ndërsa operacionet e kërkimit vazhdojnë.
Ngjarja u regjistrua mbrëmjen e së enjtes në distriktin Chamoli, në shtetin malor të Uttarakhandit. Punëtorët ndodheshin brenda një tuneli të projektit hidroelektrik Vishnugad-Pipalkoti, kur situata u përkeqësua papritur pas rrëshqitjeve të dheut.
Sasi të mëdha uji, balte dhe materialesh të tjera depërtuan në tunel, ndërsa një pjesë e strukturës u shemb. Në momentin e incidentit raportohet se brenda ndodheshin gjithsej 22 punëtorë.
Ekipet e emergjencës kanë arritur të nxjerrin të gjallë 12 persona. Shtatë punëtorë kanë humbur jetën, ndërsa kërkimet janë përqendruar te tre të tjerët që vazhdojnë të rezultojnë të zhdukur.
Operacioni po zhvillohet me vështirësi për shkak të kushteve brenda tunelit, ku prania e ujit dhe grumbullimi i mbeturinave po pengojnë avancimin e ekipeve të shpëtimit.
Në terren janë mobilizuar forca të shumta, përfshirë ekipet e menaxhimit të fatkeqësive, Policinë Kufitare Indo-Tibetane, zjarrfikësit dhe strukturat lokale të emergjencave.
Në zonën e tragjedisë ka mbërritur edhe kreu i qeverisë së Uttarakhandit, Pushkar Singh Dhami, i cili po ndjek nga afër zhvillimin e operacionit.
Aksidenti ka rikthyer në vëmendje rreziqet që shoqërojnë ndërtimin e veprave të mëdha infrastrukturore në këtë pjesë të Himalajeve. Uttarakhandi ka një terren të thyer dhe gjeologjikisht të brishtë, ndërsa rrëshqitjet e dheut dhe shembjet përbëjnë një kërcënim të vazhdueshëm, veçanërisht gjatë periudhave me reshje intensive.
Autoritetet vijojnë kërkimet për tre punëtorët e zhdukur, ndërsa pritet të hetohen edhe rrethanat që çuan në shembjen e tunelit.