TIRANË – Kreu i Partisë Demokratike, Sali Berisha, ka reaguar me tone ironike ndaj kryeministrit Edi Rama, duke komentuar pjesëmarrjen e tij në samitin e NATO-s të zhvilluar në Ankara.
Përmes një postimi në rrjetin social Facebook, Berisha ka publikuar një video nga samiti, ku kryeministri Rama shfaqet i ulur në tryezën e liderëve të vendeve anëtare të Aleancës. Në pamje duket edhe presidenti i Shteteve të Bashkuara, Donald Trump, i cili ndodhet pas Ramës, teksa bisedon me drejtues të tjerë pjesëmarrës në samit.
Duke shoqëruar videon me një koment kritik, Berisha shkruan: “Kur bëhesh kloun, edhe këtë e ke pak!”.
Reagimi i liderit të opozitës vjen pas përfundimit të samitit të NATO-s në Ankara, ku morën pjesë krerë shtetesh dhe qeverish të vendeve anëtare të Aleancës.