Një sulm me thikë ka tronditur Zvicrën mëngjesin e së enjtes, pasi tre persona mbetën të plagosur në stacionin e trenit në Winterthur, pranë Cyrihut.
Sipas mediave zvicerane, autori i dyshuar, një 31-vjeçar zviceran, sulmoi disa persona në zona të ndryshme të stacionit, ndërsa dëshmitarët thanë se ai bërtiste vazhdimisht “Allahu Ekber”.
Ngjarja ndodhi pranë një grupi nxënësish shkolle, të cilët po kalonin në momentin e sulmit. Sipas dëshmive, një mësues ndërhyri menjëherë për të larguar fëmijët dhe për t’i çuar në siguri.
“Ai mbante një thikë në dorë. Të gjithë po bërtisnin dhe po iknin me vrap”, deklaroi një dëshmitar për mediat lokale.
Pamje të publikuara në rrjetet sociale tregojnë autorin duke vrapuar në rrugë në gjendje të rënduar emocionale, ndërsa policia dhe kalimtarët përpiqeshin të largonin njerëzit nga zona.
Një tjetër dëshmitar tha se dëgjoi burrin të bërtiste “Allahu Ekber” pesë ose gjashtë herë gjatë sulmit.
Sipas autoriteteve, një prej viktimave ndodhet në gjendje të rëndë, ndërsa dy të tjerët kanë marrë plagë më të lehta. Të tre janë transportuar në spital për trajtim mjekësor.
Policia zvicerane arrestoi të dyshuarin në vendngjarje dhe ka nisur hetimet për motivet e sulmit, ndërsa një perimetër sigurie prej rreth 300 metrash u bllokua për disa orë./NewYorkPost