Një ngjarje tragjike ka tronditur Britaninë, ku një grua 38-vjeçare shtatzënë humbi jetën pasi ra nga kati i nëntë i një pallati në qytetin e Leeds, ndërsa foshnja që mbante në bark arriti të shpëtonte mrekullisht.
Sipas mediave britanike, Emma Atkinson ndodhej për vizitë në banesën e babait të saj në ndërtesën “Shakespeare Towers” në tetor të vitit 2024. Gjatë seancës së hetimit, babai i saj tregoi se vajza kishte kërkuar një cigare dhe ishte ulur pranë dritares, të cilën e hapi plotësisht.
Ai deklaroi se i kishte kërkuar ta mbyllte dritaren pasi bënte ftohtë, por pak çaste më vonë dëgjoi të bijën të thoshte: “Po iki”, ndërsa kur u kthye pa këmbët e saj duke kaluar përtej dritares.
38-vjeçarja ra nga një lartësi prej rreth 27 metrash. Babai i saj zbriti me vrap poshtë, ku një mjek jashtë shërbimit, banor i pallatit, i dha ndihmën e parë asaj dhe foshnjës që mbante në bark.Emma u transportua me urgjencë në spital, por mjekët nuk mundën ta shpëtonin për shkak të plagëve shumë të rënda.
Megjithatë, ata arritën të kryenin lindjen emergjente dhe të shpëtonin foshnjën, e cila erdhi në jetë pesë javë para kohe. Vajza, e quajtur Posie, mbijetoi dhe po merr kujdes mjekësor.
Gjatë hetimit u bë e ditur se Emma ishte diagnostikuar më parë me çrregullim emocional të personalitetit dhe kishte tentuar dy herë t’i jepte fund jetës.
Pak javë para ngjarjes, ajo kishte publikuar në rrjetet sociale një foto ku shfaqte barkun e rrumbullakosur të shtatzënisë, duke shkruar me gëzim: “Është vajzë, nuk mund të jem më e lumtur.”