Një ngjarje e rëndë ka tronditur Shtetet e Bashkuara, ku një 47-vjeçar dyshohet se vrau bashkëshorten dhe gjashtë fëmijët e tij, më pas i vuri flakën banesës dhe kreu vetëvrasje.
Christopher Karolkiewicz, 47 vjeç, bashkëshortja e tij Amanda “Maddie” Karolkiewicz, 39 vjeçe, si dhe gjashtë fëmijët e çiftit, të moshës nga 5 deri në 15 vjeç, u gjetën të pajetë në shtëpinë e tyre në Grand Haven Township, pranë Liqenit Michigan.
Sipas hetimeve paraprake, Christopher dyshohet se qëlloi fillimisht me armë zjarri gruan dhe fëmijët e tij. Më pas, ai dyshohet se ndezi disa vatra zjarri në pjesë të ndryshme të banesës, përpara se të qëllonte veten.
Policia u njoftua pas raportimeve të banorëve për tym që dilte nga shtëpia. Ekipet e emergjencës punuan për rreth tre orë për të lokalizuar burimin e zjarrit dhe për të hyrë në banesë, ku zbuluan trupat e tetë anëtarëve të familjes.
Autopsitë kanë konfirmuar se viktimat humbën jetën nga plagët e shkaktuara nga armë zjarri dhe jo si pasojë e zjarrit. Hetuesit dyshojnë se flakët janë vendosur qëllimisht në disa pika të banesës pas vrasjeve, ndërsa po vijojnë punën për të përcaktuar mënyrën e saktë se si nisi zjarri. Edhe kafshët shtëpiake të familjes nuk kanë mbijetuar.
Sipas mediave amerikane, Christopher dhe Amanda ishin njohur në vitin 2008 në vendin e punës dhe ishin martuar në vitin 2009. Çifti kishte katër fëmijë biologjikë dhe më pas kishte adoptuar edhe dy vajza.
Megjithatë, pas imazhit të një familjeje të lumtur, hetuesit po shqyrtojnë edhe problemet e mëparshme në marrëdhënien e çiftit. Rreth tetë vite më parë, Christopher dyshohet se kishte pasur një lidhje jashtëmartesore me një praktikante në vendin e punës.
Dy vite më parë, Amanda kishte ndarë në Reddit vështirësitë e martesës së saj, duke treguar për problemet në marrëdhënie dhe tradhtitë e bashkëshortit. Në disa postime ajo kishte përshkruar periudhën e vështirë emocionale dhe përpjekjet për të vazhduar jetën.
Autoritetet amerikane vijojnë hetimet për të zbardhur plotësisht rrethanat dhe motivet e kësaj tragjedie familjare.