Një lajm që ka mbuluar me dhimbje bluzat e bardha dhe më gjerë ka ardhur nga Spitali Universitar i Traumës. Me hidhërim të thellë, Shërbimi i Neurokirurgjisë ka njoftuar ndarjen nga jeta të Prof. Agim Kolasit, një prej figurave dhe pinonierëve të mjekësisë shqiptare.
Ikja e tij shënon jo vetëm humbjen e një mjeku të jashtëzakonshëm, por edhe të një mendjeje të rrallë, një pedagogu frymëzues dhe një njeriu që i dha kuptim fjalës “mision” në profesionin e tij.
I lindur në Kolonjë, vendlindjen që e mbajti gjithmonë në zemër, Prof. Kolasi u formua në Fakultetin e Mjekësisë në Tiranë dhe në vitet ’70 u specializua për neurokirurgji në Kinë. Me rikthimin në atdhe, ai nuk solli vetëm dije, por një vizion të ri për mjekësinë shqiptare.Në vitin 1972, ai hapi repartin e Neurokirurgjisë në Spitalin Ushtarak, duke vendosur themelet e një shërbimi që do të ndryshonte fatin e qindra e mijëra pacientëve. Ishte ndër të parët që realizoi ndërhyrje të ndërlikuara kirurgjikale dhe aplikoi metoda moderne diagnostike në Shqipëri, duke lënë gjurmë të pashlyeshme në historinë e mjekësisë.
Gjatë jetës së tij, Prof. Kolasi realizoi mijëra operacione dhe dha një kontribut të çmuar në studimet shkencore, duke u bërë një udhërrëfyes për breza të tërë mjekësh. Por mbi të gjitha, ai ishte një njeri që e vendosi gjithmonë pacientin në qendër, duke jetuar sipas parimit të tij të palëkundur: “Salus aegroti suprema lex esto” shëndeti i pacientit mbi gjithçka.
“Sot, ndërsa e përcjellim në përjetësi, e dimë se ai nuk largohet plotësisht. Sepse, siç thoshte vetë: “Njeriu jeton për aq kohë sa kujtohet me dashuri dhe nderim”. U prehtë në paqe profesori ynë i dashur. Drita që ai ndezi në ne, do të vazhdojë të ndriçojë përherë”, shkruan ndër të tjera Fatos Olldashi Shefi i Shërbimit të Neurokirurgjisë në SUT.
