“Zëre se e kam shkruar unë”: Ish-drejtori i RTSH-së, Thoma Gëllçi mbështet thirrjen për dorëheqjen e Edi Ramës
Protestat masive që kanë përfshirë vendin prej 25 ditësh duket se po japin efektet e para jo vetëm në sheshe, por edhe brenda radhëve të socialistëve. Thirrjeve gjithnjë e më të forta për dorëheqjen e Kryeministrit Edi Rama, së fundmi i është bashkuar edhe një figurë e njohur dhe me peshë në historikun e Partisë Socialiste, ish-drejtori i Përgjithshëm i Radio Televizionit Shqiptar (RTSH), Thoma Gëllçi.
Në një reagim të drejtpërdrejtë në rrjetet sociale, Gëllçi ka shprehur miratimin e tij të plotë për qëndrimin e ashpër të mbajtur nga themeluesi i FRESSH, Ilir Zela. Ky i fundit, përmes një mesazhi publik, ngriti alarmin mbi situatën aktuale në vend dhe i kërkoi hapur dorëheqjen kreut të qeverisë si rrugëdalje nga kriza e thellë politike e sociale.
Për Gëllçin, argumentet e Zelës janë aq të goditura saqë ai i ka bërë të vetat ato fjalë.
“Të lumtë Ilir! Zëre se e kam shkruar unë”, ka komentuar Gëllçi në profilin e Zelës në Facebook, duke vulosur kështu daljen e tij të hapur kundër lidershipit aktual të qeverisë.
Kush është Thoma Gëllçi dhe rrugëtimi i tij politik
Dalja e Gëllçit kundër qeverisë aktuale merr një rëndësi të veçantë për shkak të profilit të tij të lartë publik. Ai ka qenë në qendër të vendimmarrjes dhe komunikimit qeveritar për vite me radhë gjatë qeverisjeve të shkuara socialiste.
Karriera e tij e spikatur si zëdhënës qeverie nisi në një nga periudhat më të vështira të historisë moderne të Shqipërisë. Ai shërbeu si zëdhënës i Qeverisë së Pajtimit Kombëtar, me Kryeministër Bashkim Fino, nga marsi deri në qershor të vitit famëkeq 1997.
Me ardhjen në pushtet të socialistëve pas atij viti, Gëllçi u shndërrua në figurën kyçe të zyrave të informacionit, duke qenë zëri zyrtar i disa kryeministrave. Ai shërbeu krah Kryeministrit Fatos Nano gjatë viteve 1997-1998, për të vijuar më pas në krah të Kryeministrit Ilir Meta në periudhën 1999-2002. Më vonë, ai u rikthye sërish pranë Fatos Nanos, duke shërbyer nga viti 2002 deri në 2005.
Nga emigrimi në SHBA tek drejtimi i RTSH-së
Pas rotacionit politik në vitin 2005 dhe daljes së Partisë Socialiste në opozitë, Gëllçi zgjodhi të shkëputej, duke emigruar drejt Shteteve të Bashkuara të Amerikës.
Rikthimi i tij në skenën publike shqiptare ndodhi disa vite pas rikthimit të socialistëve në pushtet. Në maj të vitit 2016, ai u zgjodh për të marrë drejtimin e Radio Televizionit Shqiptar. Në krye të institucionit mediatik publik, ai qëndroi për një mandat të plotë prej 5 vitesh. Gëllçi u lirua nga kjo detyrë në maj të vitit 2021, kohë kur në vend të tij si komanduar u emërua Martin Leka.
Sot, në kushtet kur vendi po zien nga protestat që nuk tregojnë asnjë shenjë ndaljeje, reagimi i Thoma Gëllçit dhe mbështetja ndaj Ilir Zelës dëshmon se kërkesa për largimin e Edi Ramës nuk vjen më vetëm nga rruga, por edhe nga emrat që dikur kontribuan në ngritjen dhe mbajtjen e pushtetit të së majtës në Shqipëri.