Autoritetet tajlandeze kanë arrestuar një shtetas australian 46-vjeçar si të dyshuarin kryesor në vrasjen brutale të një vajze 17-vjeçare, trupi i së cilës u gjet i mbyllur në një valixhe.
I dyshuari u ndalua nga policia në Aeroportin Ndërkombëtar Suvarnabhumi të Bangkokut, ndërsa po përpiqej të blinte një biletë për në Perth të Australisë. Një zyrtar i policisë së Pattayas i tha AFP-së se 46-vjeçari u mor në paraburgim menjëherë pas marrjes në pyetje, megjithëse ai vazhdon t’i mohojë akuzat.
Autoritetet e gjurmuan atë duke analizuar pamjet e kamerave të sigurisë. Në një dokument video, australiani u shfaq duke hyrë në një ndërtesë në resortin turistik Pattaya me vajzën 17-vjeçare tajlandeze natën e së mërkurës.
Disa orë më vonë, i njëjti burrë është filmuar duke dalë nga ndërtesa vetëm, duke mbajtur me vështirësi një valixhe të madhe të zezë, të cilën e vendosi në pjesën e pasme të një skuteri.
Të nesërmen, policia e gjeti valixhen të hedhur pranë shinave të trenit. Brenda ishte trupi i vajzës fatkeqe, e cila kishte lëndime të dukshme, sipas gazetës lokale Pattaya News.
Autoritetet policore tani po presin rezultatet zyrtare të autopsisë, si dhe gjetjet laboratorike, në mënyrë që të ngrenë akuza ndaj 46-vjeçarit për vrasje, rrëmbim të një të mituri për motive seksuale dhe fshehje të një kufome.