Të paktën 41 persona kanë mbetur të plagosur pasi një autobus pasagjerësh u përmbys në autostradën Kaman–Ankara, pranë qytetit të Kırıkkale në Turqi. Aksidenti ka shkaktuar panik mes pasagjerëve dhe ka vënë në lëvizje menjëherë shërbimet e emergjencës.
Sipas agjencisë Anadolu, ngjarja ndodhi pasi shoferi humbi kontrollin e mjetit për arsye që ende nuk janë bërë të ditura. Si pasojë, autobusi doli nga rruga dhe u përmbys në anë të autostradës, duke lënë dhjetëra persona të lënduar.
Menjëherë pas sinjalizimit, në vendngjarje mbërritën forca të shumta të policisë, ekipet mjekësore, zjarrfikësit dhe ambulancat. Ekipet e shpëtimit u angazhuan për të nxjerrë pasagjerët nga autobusi dhe për t’u dhënë ndihmën e parë në vend. Më pas, të plagosurit u transportuan drejt spitaleve më të afërta për trajtim të specializuar.
Autoritetet turke kanë bërë të ditur se tre prej të plagosurve ndodhen në gjendje të rëndë shëndetësore dhe po marrin kujdes intensiv nga mjekët. Ndërkohë, pjesa tjetër e të lënduarve raportohet se kanë pësuar dëmtime të ndryshme, por janë jashtë rrezikut për jetën.
Policia ka nisur një hetim të plotë për të zbardhur rrethanat dhe shkaqet që çuan në këtë aksident, ndërsa pritet që ekspertët të analizojnë edhe gjendjen teknike të autobusit, kushtet e rrugës dhe çdo faktor tjetër që mund të ketë ndikuar në përmbysjen e mjetit.