Gazetarja Klodiana Lala ka zbuluar se hetimi i Prokurorisë së Posaçme në lidhje me Zvërnecin ka nisur prej 1 viti e gjysmë.
Sipas saj, të dhënat që SPAK ka në duar, mund të “djegin” nivele të larta në politikë.
“Jemi ende herët të dimë ç’po ndodh me Zvërnecin, por SPAK ka një dosje që mund të përvëlojë në nivele të larta
Hetimi nga SPAK nuk ka nisur sot, vijon prej 1 viti e gjysmë. Sot janë ushtruar kontrolle nga persona të lidhur me Artur Shehun, një person kontrovers i botës së krimit. Janë sekuestruar celularë, ka përgjime edhe të prokurorive të huaja“, tha ajo.
Eduart Subashi, personi i dhunuar nga rojet private gjatë protestës në Zvërnec, u shpreh se si qytetar i Vlorës kishte dalë për të kërkuar të drejtën e tij, për një pronë që tha se e zotëron me dokumenta.
Në një lidhje live në “Breaking” me Dafina Hysën, Subashi u shpreh se gardhi i vendosur i përngjan situatës në Palestinë, duke shtuar se si qytetar shqiptar dhe grek i është bllokuar edhe rruga e fshatit ku ai jeton.
Subashi shtoi se si ai janë edhe rreth 300 qytetarë të tjerë, të cilët nuk janë informuar për projektin në Zvërnec.
“Isha thjesht duke pyetur pse ishte vënë ai gardh atje dhe pse është mbyllur rruga e fshatit ku ne vijmë. Unë jam banor i Zvërnecit. Unë jam qytetar shqiptar dhe grek. Aty nuk kam ardhur i dërguar nga dikush.
Kam ardhur sepse kam tapinë e tokës sime që në 1991. Po jam përfitues me 5701, një tokë e stërgjyshit tim. Kur u vu ai gardhi i Palestinës? Sepse atë më kujton kur shoh gjëra në TV. Nuk jemi informuar nga askush për projektin.
Kur u vu gardhi rrethues, e mora vesh. Të gjithë banorët kanë pronësinë e tyre, me dokumenta. Unë di që kam tokën time atje, të gjithë bashkëfshatarët e mi kanë toka atje. Mund të jenë rreth 300 banorë të tjerë. Nuk ka zgjidhje askund.
Kudo që përplasemi, thonë nuk ka dalë ligji, e kemi tokën në përdorim. Nuk na japin dokumente në Zvërnec, nuk del nga asnjë zyrë. Pasi më qëlluan, atëherë policia u fut dhe më tërhoqi pas”, u shpreh Eduart Subashi. /TCH