Presidenti i Shteteve të Bashkuara, Donald Trump, ka deklaruar se është “absurde” që Uashingtoni të vazhdojë të mbajë barrën kryesore të NATO-s, ndërsa kritikoi aleatët evropianë. Në një postim në platformën e tij Truth Social, Trump shkroi se marrëdhënia mes Shteteve të Bashkuara dhe NATO-s “nuk është reciproke”.
Postimi i tij në Truth Social përfshinte një grafik që tregonte sasinë e shpenzimeve të NATO-s, me SHBA-të që investojnë shumë më tepër sesa disa shtete të tjera anëtare.
Kujtojmë se ky reagim vjen pasi Shqipëria është renditur ndër vendet që nuk plotësojnë kriteret e NATO-s për shpenzimet. Sipas agjencisë Reuters, një gjë e tillë ka vënë në dyshim edhe zhvillimin e samitit të NATO-s në vitin 2027 në Shqipëri.
Administrata e Trump ka kundërshti për organizimin e këtij samiti në Shqipëri.
Ndërkohë deklarata e Trump vjen vetëm pak ditë përpara samitit të NATO-s, i cili do të mbahet më 7 dhe 8 korrik në Ankara, ku pritet që një nga temat kryesore të jetë ndarja e barrës financiare dhe ushtarake brenda aleancës.
Trump ka përsëritur vazhdimisht se Evropa duhet të marrë përgjegjësinë kryesore për mbrojtjen e saj, ndërsa administrata amerikane ka nisur tashmë të reduktojë angazhimet ushtarake në kontinent.
Edhe Sekretari i Shtetit i Shteteve të Bashkuara, Marco Rubio, ka paralajmëruar se pakënaqësitë e presidentit ndaj aleatëve do të jenë pjesë e diskutimeve në samitin e Ankarasë.
Ka spekulime se ky do jetë samiti i fundit i NATO-s ku do të marrë pjesë Donald Trump.