Një ngjarje e rëndë është regjistruar në fshatin Karkavec, në Njësinë Administrative Qukës të bashkisë Prrenjas, ku një 69-vjeçar Gani Danga, është arrestuar nga policia nën dyshimin se ka tentuar të djegë me benzinë bashkëshorten e tij 67-vjeçare.
Sipas informacioneve paraprake, autori dyshohet se fillimisht ka ushtruar dhunë fizike dhe psikologjike ndaj bashkëshortes, ndërsa në gjendje të dehur i ka marrë me forcë telefonin celular dhe më pas e ka lyer me benzinë, duke i vënë flakën.
Burime nga hetimi bëjnë me dije se ngjarja mund të ketë ndodhur për motive xhelozie, por rrethanat e plota po verifikohen nga organet ligjzbatuese.
Dyshohet gjithashtu se në familje ka pasur më herët raste dhune, ndërsa viktima kishte qenë e pajisur me urdhër mbrojtjeje gjatë muajve të fundit.
Pas ngjarjes, 67-vjeçarja është transportuar fillimisht në spitalin rajonal të Elbasanit dhe më pas në repartin e djegieve në Tiranë, ku ndodhet nën kujdes mjekësor dhe jashtë rrezikut për jetën.
Policia ka arrestuar menjëherë autorin e dyshuar pas denoncimit të fqinjëve, ndërsa grupi hetimor po vijon punën për zbardhjen e plotë të rrethanave dhe dokumentimin ligjor të rastit.